ස්වභාවිකව ම කොලෙස්ටරෝල් පාලනය කරගන්නේ කොහොමද?

355 Views

සෞඛ්‍ය සම්පන්න දිවියක් ගත කිරීම සඳහා වයස අවුරුදු 25 වන විට කොලෙස්ටරෝල් පරීක්ෂාවක් සිදු කළ යුතු බව පර්යේෂකයින් කණ්ඩායමක් පෙන්වා දී තිබෙනවා.

පර්යේෂකයින් පවසන්නේ, හෘද රෝග හා ආඝාතයට ගොදුරු වීමෙන් ඇති වන ජීවිත අවදානම ගණනය කිරීම සඳහා එලෙස කොලෙස්ටරෝල් පරීක්ෂා කිරීම වැදගත් වන බවය.

කාර්යබහුල ජීවිත ගත කරන බොහෝ දෙනාගේ ජීවන රටාවන්, ආහාර රටාවන්, පවුල් ඉතිහාසය ,වයස , අධික බර සහ ව්‍යායාමවල නිරත නොවීම නිසා ඇතිවන රෝග තත්ත්වයක් ලෙස කොලෙස්ටරෝල් හඳුන්වන්නට පුළුවන්.

කොලෙස්ටරෝල් ප්‍රධාන වශයෙන් වර්ග දෙකක් තිබෙනවා. එනම් ,

අඩු ඝනත්ව ලිපොප්‍රෝටීන (LDL) – LDL ඔබේ හෘද රෝග සහ ආඝාත අවදානම වැඩි කරන නරක කොලෙස්ටරෝල් ලෙස හැඳින්වෙනවා.

අධි-ඝනත්ව ලිපොප්‍රෝටීන (HDL) – HDL යනු හෘද රෝග සහ ආඝාතය ඇතිවීමේ අවදානම අඩු කරන හොඳ කොලෙස්ටරෝල් ලෙස හැඳින්වෙනවා.

ස්වාභාවිකවම කොලෙස්ටරෝල් පාලනය කර ගන්නේ කෙසේද?

අධික ලෙස කොලෙස්ටරෝල් තිබෙන ඔබට පෝෂ්‍යදායී ආහාර වේලකට හුරු වීම ජීවන රටාවේ කල හැකි වැදගත්ම වෙනස්කම්වලින් එකක්.

ක්ෂණික ආහාර, සකසන ලද ආහාර, තෙල් අධික ලෙස තෙල් යෙදු ආහාර පරිභෝජනය කිරීම පාලනය කර ගුණාත්මක ආහාර ඔබේ ආහාර වේලට එකතු කර ගැනීමට හැකි නම් එය ඉතාම වැදගත්.

ඔබ මොන තරම් කාර්යබහුල කෙනෙක් වුණත් ඔබේ ආහාර වේලෙහි අඩංගු වන කැලරි ප්‍රමාණය පිළිබඳ සැලකිලිමත් වී හැකිතරම් කැලරි සහිත ආහාර පරිභෝජනය කිරීම අවම කරන්න.

තන්තු බහුල ආහාර පරිභෝජනය කරන්න

බොහෝ ශාරීරික ක්‍රියාකාරකම් සඳහා තන්තු උපකාරී වන අතර එය ආහාර දිරවීමේ ක්‍රියාවලිය වැඩි දියුණු කිරීම සඳහා ද දායක වනවා.ඉහළ තන්තු සහිත ආහාර වේලක් ඔබේ ශරීරයට සහ රුධිරයට අනවශ්‍ය කොලෙස්ටරෝල් අවශෝෂණය කර ගැනීම වළක්වන බවත්, ද්‍රාව්‍ය තන්තු ග්‍රෑම් 3 ක් මඟින් අහිතකර කොලෙස්ටරෝල් 18% කින් පමණ අඩු කරන බවත් පර්යේෂණ මගින් පෙන්වා දී තිබෙනවා.

ව්‍යායාම

ඔබේ ශරීරයේ ක්‍රියාකාරී බව වැඩි කිරීමට සහ හෘද රෝග අවදානම අඩු කර ගැනීමට නම් ව්‍යායාමවල නිරත වීම ඔබ අනිවාර්යයෙන්ම කළ යුතුයි.
අවම වශයෙන් දිනකට පැයක්වත් ව්‍යායාමවල නිරත වීම, ඇවිදීම හෝ දිවීම වැනි ක්‍රියාකාරකම්වල නිරත වීම ඔබට කළ හැකියි.

ඔබ දැනටමත් අධික කොලෙස්ටරෝල් සහිත තත්ත්වයකින් පෙළෙනවා නම් ඔබේ වෛද්‍යවරයා හමුවී උපදෙස් ලබාගෙන හොඳ ව්‍යායාම පුහුණුකරුවෙකු යටතේ ඔබට සුදුසු ව්‍යායාම රටාවක් අනුගමනය කිරීම මගින් ඉතා හොඳ ප්‍රතිඵල ලබා ගන්න ඔබට පුළුවන්.

බර අඩු කරගන්න

මේ කාරණාව ඉහත කාරණාවටම සම්බන්ද දෙයක්. විශේෂයෙන්ම ශරීරයේ අනවශ්‍ය ලෙස මේදය තැන්පත් වී ඇති පුද්ගලයන්ට හෘද වාහිනී රෝග , මානසික අවපීඩනය , දියවැඩියාව , අක්මා සහ වකුගඩු රෝග ඇතුළු බොහෝ රෝග තත්ත්වයන් ඇතිවිය හැකියි. මේ නිසා ආහාර පාලනය සහ ව්‍යායාම කිරීම යන කාරණා දෙක පිළිබඳවම ඔබ විශේෂයෙන් සැලකිලිමත් වන්නට ඕනේ.

සම්පූර්ණ ධාන්‍ය පරිභෝජනය කරන්න

සම්පූර්ණ ධාන්‍ය බී විටමින් සහ ද්‍රාව්‍ය තන්තුවලින් පොහොසත් වෙන අතර ඒවා මගින් අහිතකර කොලෙස්ටරෝල් මට්ටම අඩු කර හෘද රෝග ඇතිවීමේ අවදානමද අඩු කරනවා.

පර්යේෂණ මගින් පෙන්වා දී ඇති ආකාරයට දිනකට ධාන්‍ය වර්ග එකක් හෝ දෙකක් ආහාරයට ගැනීම මගින් හෘද රෝග ඇතිවීමේ අවදානම ආසන්න වශයෙන් 10% – 20% අඩු කළ හැකි බවයි.

ස්වාභාවිකවම කොලෙස්ටරෝල් මට්ටම අඩු කර ගත හැකි ආහාර මොනවද ?

ඕට්ස්
බෝංචි
සුදුළූණු
වම්බටු
කැරට්
අර්තාපල්
බණ්ඩක්කා
ටෝෆු
සෝයා
බාර්ලි
වෝල්නට්ස්
රටකජු
ආමන්ඩ්
ඇපල්
අලිගැටපේර
බෙරි වර්ග

ඔබේ කොලෙස්ටරෝල් මට්ටම දැනගත යුත්තේ කෙසේද?

වයස අවුරුදු 20 ක් හෝ එයට වඩා වැඩි සෑම අයෙක්ම අවම වශයෙන් අවුරුදු 5 කට වරක් වත් රුධිරයේ කොලෙස්ටරෝල් මට්ටම පරීක්ෂා කල යුතුවේ. ඒ සඳහා නිර්දේශිත පරීක්ෂණය, ලිපෝප්‍රෝටීන් පැතිකඩ හෝ ලිපිඩ පැතිකඩ (Lipoprotein profile or lipid profile) ලෙස හැඳින්වේ. මෙම පරීක්ෂණය සඳහා රුධිර සාම්පලය ගත යුත්තේ ආහාර පාන ගැනීමෙන් වැළකී පැය 9-12 ක කාලයකට පසුවය.

අපේ ශරීරයට බොහෝ රෝග තත්ත්වයන් ඇති වන්නේ අප එතරම් සැලකිල්ලක් නොදන්වන අපේ ම ජීවන රටාවන් නිසයි.

ඒ නිසා රෝග තත්ත්වයක් ඇති වීමෙන් පසුව එය පාලනය කර ගැනීමට ප්‍රතිකාර ගන්නවාට වඩා එය ඇතිවීම පාලනය කර ගැනීම තමයි නුවණට හුරු.